Sunday, March 11, 2007

大熊與笨象

上星期可算是投資者難忘的日子:恆生指數幾日內急跌二千點,又突然轉頭抽上幾百點。如果玩期指的朋友好大機會應晒「左一巴、右一巴」:畀二千點蝕到攤攤腰後,心有不甘改買為沽,又畀反彈斬多刀也!


想期指這東西老頭年輕時也玩過,坦白講戰績係輸到E世都記得。因為有咁既血淚教訓,加上識到雖然二十五歲但身家已經有X位數字既UBS出身Rxxx師兄,自此都係死死地氣聽佢講:只儲幾隻股等退休(佢老人家當年推介既只係一行一保),想不到Rxxx師兄這種I Banker都會用如此穩當的做法。亦因為咁,上星期的一點小風波老頭眉頭都沒皺一下,以Rxxx師兄的講法,預左持有二十年,一點波浪算什麼?

不過有一點老頭跟Rxxx師兄看法有點不同:Rxxx師兄認為大笨象黃金期已盡,以我們還須二三十年耕耘的一代而言,增長始終不及內地金額股;然而小弟的看法是,一則大笨象的管理的確好得罕有,例外早前發出盈警不少人大驚小怪,但小弟眼中卻是踏實的象徵:雖然所謂虧損在整間公司而言不算什麼大不了,但肯面對而非掩飾實在是了不起,不少公司的崩塌就在企圖掩飾而一發不可收拾;而且大笨象的業務已是亞、歐、美三份近乎平均,即使其中一份有點頭暈身慶也不會全線崩潰,相對五行三保而言比較穩陣;進取而言,除本身親赴內地戰場外,笨象本身持有近兩成交行,以及由恆行間接持有16%興業銀行,令其間接亦會受益於內地市場,但風險相對減低。同樣道理,老頭認為魚翅航空雖好,但其兼具地產、飲品等的母公司看來更吸引。當然多未必一定好,大前題是該母公司信得過,而且其他業務亦有吸引之處,單一子公司並非眾多業務唯一收入來源,在此笨象銀行與魚翅航空的母公司都能符合。

利益申報,老頭現在手上一股笨象、魚翅、太舊也沒有,亦無意短期內購入。

10 comments:

  1. 你師兄梗係咁講LA.....
    佢攞今年所有花紅黎長線投資,
    分分鐘已經夠佢退休所用

    但係蟻民如我,就要靠短炒賺第一桶金,
    雖然好多人係過程中已經輸左一桶金....

    ReplyDelete
  2. leung:

    大笨象 = HSBC

    chung:

    如果一個人一個月儲一千大元,以10%計(大笨象一年return in price increasing plus dividend - inflation rate應該唔止),三十年職業生涯到退休已經有$1,973,880,四十年更有%5,311,080。我已經有少少偷懶,假設一年先一口氣掟$12,000入去,如果以每個月一次既仲會高少少。

    以一個二十歲非大學畢業生而言,一個月儲一千蚊只係頭幾年苦少少,絕對唔係入肉之舉。到六十歲退休時手上已經有五百幾萬,總叫夠退休了吧?而且從上面睇到十年之差可以有倍數上既分別,所以曹仁超都叫人儲錢愈早愈好,最好向仲細既子女教定。

    ReplyDelete
  3. 短炒既人多數係賺少少就放, 蝕左就長揸.
    所以, 我未聽過靠短炒可以發達.
    當然短炒細細注大大聲無壞.

    我都係聽林森池推介我才月供匯豐, 但我覺得匯豐的高增長期已過去, 所以每年可以有10%增長我有點保留, 但勝在夠穩陣. (而家仲供緊, 反正每月要供的金額也不太多)

    你師兄的做法仍然可行, 問題係點樣選一些合適的高增長股作月供. 坦白講我唔識揀, 寧願買基金算了.

    五百幾萬, 就算不計通脹, 嚴格來講係不夠退休. 養一個孩子都要四百萬啦.

    btw"佢老人家當年推介既只係一行一保" - 是不是指匯豐及宏利?

    利益申報:筆者持有匯豐, 但沒有揸宏利(基金所持不包括在內)

    ReplyDelete
  4. 笨象的確很難保持過去的增長率,但小弟相信牠一年股價即使不能升一成亦相差不遠(假設派息跟通脹相差不大)。而且大家都記得可愛的八號仔吧?可見企業管治何等重要,而笨象就是畀到人信心的選擇。即是不大賺,至少不會輸清,另一個保守而穩當可靠的是觸電。

    四百萬一個細路這數「可大可小」,想來一個月才能儲一千大元的朋友總不會花四百萬在一小朋友身上吧,而且以師兄收入何會一個月儲區區一千元?

    申報時間:小弟現手上沒有笨象或觸電,有關Rxxx師兄推薦的一行一保已發訊息予你。

    ReplyDelete
  5. 自從十多年前的一次慘痛教訓後, 我就一向都係奉行"長揸"政策, 八,九年前更加奉行左"非藍籌不揸".

    我可以好清楚話畀你聽, 一年18%絕非難事!!!

    ReplyDelete
  6. jiero:

    某間由猶太朋友主管的大藍籌。雖然升得唔快,但管理質素相當可靠。

    cb1668:

    我都係因為輸期指輸到攤攤眼先接受細水長流!

    ReplyDelete
  7. 在牛市時, 以個別一兩年黎睇一年有18%回報當然不難. (尤其如果錢少的話)

    但揸住一大舊錢可以有年年keep住有18%回報就需要ibanker的眼光+超乎常人的耐性及膽色.

    ReplyDelete
  8. 單以笨象(或「龍頭銀行股」),長年增長18%可不是夢,而且即使稍低亦勝於在槓桿上大炒一次。

    ReplyDelete